LA PAGE WALLONNE DU DIMANCHE
Jacques Desmet vient de publier un nouveau texte sur FB que nous avons trouvé sympa et vous le livrons. Profitez de cette journée endimanchée pour tenter de le traduire.
On mauvî chëfèle së on-aube d’au Potèt. On-ôte tchîp’téye dè l’ tchapèle d’ Èrbâye po lî rèsponde :
« Qui èstoz vos ? Monsieû quë chëfèle së bén èt d’èwou èstoz ? »
« Bén, djë d’meûre à Batavia, lès-omes dëvën’nèt sots ; ‘là-t-ë ni qu’ël ont tapé m’n-aube djë, ça faît qu’ dj’a pèrdë m’ nëd ! »
« Èt vos-è vourîz bén r’fé on-ôte djë wadje ? »
« Bén oyë ! mins l’ djoû d’audjoûrdë, savoz : quand on vëke mièrseû, èt qu’on va à l’ banque po prëster dès liârds, pfft ! »
« Â ! bén ça, c’èst m’ portraît tot ratchî, c'èst l’ minme vécë savoz, djë so tote seûle à tchanter po l’èglîje dë Pitrin èt l’ tchapèle d’ Èrbâye ! »
« Èt së nos mètrîn’ nos spaugnes èchone, n’arot-ë ni moyén dè l’ fé po nos deûs ? »
« Auwe là ! mon parent, ë m’ chone quë v’ n’èstoz ni à one twatche près. Djë n’ vos conè ni më ! »
« Bén, më non pës, djë n’ vos conè ni, mins së vos m’ dëjoz quë vos tchantoz po deûs-èglîjes, ça më s’bar’roz on fèl côp, quë v’ sèriz l’ diâle ! »
« Èt së ça sèroz vos qu’èst l’ diâle ? »
« Â ! Bén ça, ça n’è ni malaujë à soyë. Vos-aloz së l’ mârtchi à Djodogne on djûdë, èt vos pouroz î rèscontrer, totes lès djins quë m’ conèchenèt. » Ë vos l’ dîront : « Nosse Dame, quën djon.ne ome, vos ! Vos n’è troveroz ni on së bon èt ossë bia pad’zo l’ chabot d’on tch’vau ! »
« D’abôrd, më, djë n’ më fîye pës à ç’ quë lès djins racontenèt, èt deûzyinm’mint, vos m’ loumer Madame, èt djë n’ so qu’one djon.ne crapôde, adon tënoz-v’ comëfaut avou më ! »
« Lon èri d’ më, d’ vos fé dè tôrd, savoz, djë n’cache qu’a trover on bia aube èwou qu’ dj’î mètro m’ nëd, èt sayî d’î ténre min.nadje on djoû ! Dins lès rindindjes à Djodogne quétefîye ? »
« Â ça ! jamaîs ! më djë so d’ Pîtrin, èt djë nè l’ quët’rè jamaîs ! »
« Dëjoz, èt së nos vourîn’ ènnè causer, ça vos dësrindj’roz qu’on s’ veûy on djoü ? »…
« Djë tûze là !... Djudë là, à l’ vièspréye après lès ovradjes, èt c’èst l’ djoû dès anteûs ! »
« Â quë dj’ so bënauje ! Nos-îrans à l’ tchapèle à l’arbe èt d’mander à lë p’tët Stiènne qu’ë nos done consèy ! »
« Dj’î sèrè ! »
On vwèt bén quë l’ bon timps à rëv’në, lès cinsîs boutenèt aus maursadjes… èt ça tchîptéye dins tos lès-aubes !
