Nosse man m’a raconté on djoû : « Quand vos sèroz vî d’ doze ans, èt quë vos-âroz faît vosse comëgnon, djë v’ dirè on s’crèt po bén soyë vëker ! »

« Man, vos p’loz mè l’ dîre asteûre quë tot ça èst yëte ?

« Â ! Oyë, lë s’crèt po bin soyë vëker ? Bén m’ fë vo-l’-là : lès vatches në donenèt pont d’ lacia ! »

« Qwè d’djoz là ? C’è-st-one couyonade ! »

« Non.na, vos m’avoz bén ètindë ! lë vatche në done pont d’ lacia !... Ë vos l’ faut mode ! Ë vos faut r’lèver tot timpe à quatre eûre au matén po lès aler r’qwaîre dë d’ssë l’ pachë, roter dins leûs flates, lès fé r’moussî dins leûs stauves, atatchî leû kèwe autou d’ leû pate, prinde on chame po v’s-achîre, r’nètî leû pé, satchî comëfaut së leûs quate tètes, po bén fén chëmer l’ lacia au fond dè l’ saya èt fé l’ovradje vos minmes, tot seû ! Volà lë s’crèt po bén soyë vëker ! »

Lë vatche në done ni s’ lacia : së vos nè l’ modoz ni, vos n’aroz jamaîs d’ lacia !

Ë-n-a combén d’ djon.nes asteûre quë pinsenèt qu’ lès vatches donenèt dè lacia ? Qu’ë n’a qu’a drovë l’ frëgo po-z-ènn’oyë ? Dins leû tièsse c’èst : « Dj’ènnè vou, dji d’mande èt dj’a, èt tot d’sûte ! On lès-a abëtouwé au pës aujë ! Mins, cë n’èst ni insë qu’ ça va. Cë qu’on r’çû, c’èst grâce à voste ovradje quë v’ l’âroz ! Èt së vos n’ boutoz ni, vos n’âroz jamaîs rén. Ë vos faut branmint forbouter po-z-arëver à one saqwè, po ‘nn’arëver là !...

Paurtadjîz vosse coradje avou vos-èfants dè timps qu’ë sont co tot djon.nes po qu’ë n’atrapënèche ni one mentalëté d’ mauvaîs byin ni rèsponsâbe, èt qu’i n’ seûyenèche ni oblidjî d’aler vëker à l’ tauve dès pôves. One mentalëté qu’on nos oblëdje à sûre dëspôy dès-ans au lon.

Sovenoz-è vos !

« Lès vatches ni donenèt pont d’ lacia, vos d’voz bouter po ça !...

Maujeni